Foto der Woche
Sersbski srjedźnošulski dźeń 2010 w Slepom
Třiceteje hapyrleje wotmě so na farskim teritoriju a w Slepjanskim kulturnym centrumje (SKC) naš nětko hižo tradicionelny, kóždolětny serbski srjedźnošulski dźeń lětsa hižo k pjatemu razej.
Ćiła rozmołwa a hibičiwa atmosfera knježeštej přez cyły čas, naposlědk tež dźakowano słóncu, kotrež měnješe na tutym dnju tež najebać wšitkim špatnym wuhladam jara derje z nami.
W srjedźišću steješe lětsa tematika serbskich medijow. K tomu přeprošachmy sebi zastupjerjej Serbskich Nowin a radija „Satkula“ kaž tež filmowcow SAEK.
W stacijowym přeběhu zeznachmy aktiwnje dźěło tutych institucijow a wuspytachmy so samo. Tak zetkachmy tu abo tam někotrych z kameru w ruce abo před kompjuterom při předźěłanju krótkeje filmoweje pasaže abo při zahrawanju spěwa w radiju. Wosebity dźak pak słuša na tutym městnje pilnym pčołkam projekta Serbskich Nowin!!! Franzi Mäkelburg, Kevin Lohr, Marlen Ladusch a Klemens Kavelmann dźěłachu přez cyły dźeń pilnje na swojich interviewach, napisachu a přełožowachu do serbšćiny, zestajachu a korigowachu.
Tamni šulerjo krosnowachu so w samsnym času pod nawodom serbskeho dyrdomderja Achima Miča po sćěnach zetkawanskeho centruma abo poćichu so při staflowym běhu Płomja. Kreatiwnosć wuwabištej mjez druhim staciji ilustrowanja k dr. Marji Grólmusec a pjelsćowanje.
Wulki nawal dožiwichu sobudźěłarjo młodźinskeho towarstwa PAWK, kotřiž ćišćachu t-shirty ze serbskimi logami.
Dalši zamołwity nadawk přewzachu šulerjo, kotřiž wuwučuja so po koncepće 2plus. Woni hódnoćichu pod nawodom Juliany Kaulfürstoweje nowu wuknjensku software Serbskeho šulskeho towarstwa za dźěćace dnjowe přebywanišća.
Za ćělne derjeměće postarachu so šulerjo 10a hromadźe z knjeni Messnerowej a knjeni Wanekowej. Wutrobny dźak wam za wašu prócua za woprawdź słódny wobjed!!!
Hudźbny přikusk poskićeštaj nam Walburga Wałdźic a Max z Kolumbiskeje na žurli SKC, prjedy hač so wšitcy w 13 hodź. rozžohnowachmy.
Dźakuju so wam wšitkim za dobre sobudźěło a zajim, kotryž sće za stacijowe dźěło nam napřećo přinjesli.
Lubje strowi was Mónika Hajdanec
|
|||||||||||||
| zurück |
